中環在線：爆粗代理釘牌 14日
2012年05月03日
當街隨地吐痰要罰錢，地產代理講粗口更加要釘牌。上年 7月，馬鞍山有代理行老闆因一時衝動同人霎氣，當街爆粗，俾人拍低放上 YouTube，搞到俾地產代理監管局（ EAA）臨時釘牌。
違規追數被譴責
地監局紀律委員會根據《地產代理條
例》， 3月份向
31名持牌代理及公司進行紀律處分，有人因為搵收數公司向客戶追討欠數時，未有遵守局方發出嘅執業通告，被予以譴責。其中兩名經紀更加因為以粗言穢語辱罵
其他地產代理，而被臨時釘牌 14日，本月 5日生效。其中一個係吳謙成，同上年馬鞍山港滙物業老闆爆粗主角同名。
華華噚晚都打過吳謙成手提，睇吓佢有乜回應，可惜打極都唔通。
此外，新世界（ 017）發展嘅沙田新盤溱岸 8號，有代理膽大包天，喺內地網站兜售政府未批准賣樓嘅樓花，事件曝光後，佢哋都知瀨嘢，即時鏟走晒啲資料。華華噚日上過呢個網，已冇晒呢個盤嘅「放盤」喇。 
沒有留言:
張貼留言