郭妤淺接受電台訪問時護夫情切，大讚唐英年是好丈夫、好父親，更一度講到眼紅紅。
妻聲淚俱下為夫說好話
荒唐伯父三擺老婆上枱
2012年03月08日
【本報訊】從笑着回應丈夫的感情缺失，到哭着承擔僭建責任，唐英年太太郭妤淺昨天第三度為夫「拆彈」，並以丈夫「一時軟弱」、「感情豐富」來回應私生子醜聞。她在大氣電波流着淚說，丈夫即使曾經出軌，如今「浪子回頭」已經足夠，「最偉大嘅愛就係原諒」。時事評論員批評，唐英年繼續龜縮，三度擺老婆上枱。記者：白琳
至愛檔案：自以為幸福的豬嫂 
面對醜聞「日日新鮮日日新」的丈夫，唐太昨日接受商台訪問時，矢言不會因私生子醜聞而放棄這段婚姻，要履行同甘共苦的承諾，「一個人浪子回頭好緊要，佢唔係完美。佢係一個好善良嘅人，佢做呢啲事係佢一時蠢啦，但係佢真係冇惡意」。她認為唐英年是 99分的父親、 90分的丈夫，「我做人都幾有判斷力，叫我由頭嚟過，我都會嫁畀唐英年」。
幾多次婚外情「唔好數」
;)
搞婚外情兼有私生子的唐英年，昨出席導演協會座談會拉票。馬泉崇攝
當被主持人問及丈夫婚外情的次數時，唐太顯得有點錯愕，「次數都唔好數，或者我疏忽咗佢。佢一時間軟弱，我會明白嘅。佢係一個感情好豐富嘅人，呢幾十年係有行出過軌道，不過永遠都返嚟。我知道佢係終身愛我，已經好足夠」。
說到支持者對他們不離不棄，唐太即泣不成聲，「雖然咁多人挑剔你、鬧你，但係好多朋友同事都話，加油唔好放棄，唐生係最好。我知道邊啲係真朋友」。對於提名唐英年的選委陸續轉軚，唐太稱不熟政治，但認為丈夫很有胸襟，「人係有選擇，睇佢自己判斷力。我唐太永遠都支持我先生，就算佢話佢有幾多缺失，我覺得佢最有理想、最有包容、最有遠見去幫香港。佢唔係最叻，但係最有胸襟，唔會搞分裂，唔喺人哋背後講壞話，佢係一個君子」。
唐太又否認僭建一事被丈夫擺上枱，「唐生想保護我，一開始越講越亂。佢咁愛我而保護我，我好難過」。她再次公開道歉，希望公眾原諒，又認為丈夫很無辜，「每個屋企係避風塘，畀佢返嚟休息。點知避風塘變咗戰場，我好難過，非常後悔。有時坐喺度諗，點解自己咁貪心呢？」
塗脂抹粉無助挽回民望
唐英年昨出席論壇後，被問到報章刊登的私生女照片是否屬實時拒絕評論，「我講過好多次，我係唔會再進一步補充我以前講過嘅說話，因為牽涉第三者，係會影響第三者生活，我唔想再畀外界進一步影響佢哋」。被問到稍後會否公開私生子女身份，以釋除公眾對利益衝突的疑慮，唐英年自稱一向以公開、公平、公正的原則施政，並會繼續以此原則做事。
時事評論員劉銳紹指出，唐太無論是否按「劇本需要」開腔護唐，客觀效果只會令公眾認為唐英年第三次擺老婆上枱，「唐太唔可以呢個時候棄唐而去，或者覺得有需要企出嚟講幾句，雖然佢好值得大家同情，但係呢個局面都係唐英年一手造成」。他又指，唐英年一直對私生子問題閃縮，不敢面對現實，加上僭建風暴，支持者只剩下基本擁躉，「公眾認為佢唔想影響第三者只係為咗遮醜，家民望低到冇得再低，唐太幫佢塗脂抹粉，起唔到任何作用」。 
沒有留言:
張貼留言