蘭桂坊去銅鑼灣要$150

蘭桂坊去銅鑼灣要$150 喜愛夜蒲族　搭的要鬥bid

適中字型 較大字型

蒲友勝地蘭桂坊近日出現「海鮮的」劏客。

【本報訊】港人喜愛夜蒲，中環蘭桂坊更是蒲友朝聖地；然而這個香港地標，近年卻遭一群新興「海鮮的」入侵；蒲友盡興過後，還要拖着帶醉倦極身軀，與他人鬥快鬥高價爭的士回家。《蘋果》連續三個周五至周日，直擊「海鮮的」劏客實況，司機全部鎖車門，然後校低車窗，任由模、老外、醉漢自行開價爭上車，到尖沙嘴要200元、銅鑼灣都要150元，在蘭桂坊爭的士猶如進入拍賣場。記者：葉競科　陳兆剛

 

蘭桂坊的士爭奪戰，逢周五周六或假期前夕定必出現，並於深宵二時揭開戰幔，地點包括Clubbing場聚集的威靈頓街、以及介乎蘭桂坊及皇后大道中的德己立街路段。

每逢周末或假期前夕，蘭桂坊深宵時分便會出現「海鮮的士」；蒲友要爭相出價，或者接受遠超車資的定價，才搶到的士回家。陳兆剛攝

「私影模」譚小姐一身性感夜蒲裝束，但在街頭截的士也頻頻「食檸檬」，她炮轟海鮮的有損蘭桂坊的旅遊景點形象。

駐守蘭桂坊警察，以驅趕或票控雙黃線上落客等方式，阻撓海鮮的。

冚旗鎖門等出價

剛於酒吧遣興的俊男美女，分立行車線左右兩旁，不約而同伸手，務求截車回家或轉場再玩。然而駛入兩街之的士，超過九成「冚旗」，並把車門緊鎖，卻校低司機位左右車窗，任由蒲友於兩旁探頭問價；熟行情者會主動抬價求載，有時則由司機開價。
「按錶加100元去旺角！」、「150元去銅鑼灣！」抬價聲此起彼落，司機聽到合心水的地點及價錢才把車門打開，否則耍耍手繼續前行。有接連遭拒的蒲友，為吸引司機目光半開玩笑說：「馬鞍山！馬鞍山夠遠未？機場嘞！去機場！」可惜仍是無果，換來謾罵四起。
衣着性感的美少女，在夜場或者受盡擁戴，在街頭截車卻勁食檸檬。職業為「私影模」的譚小姐，酒後準備到上環會合朋友，苦等20分鐘仍未獲接載。「我之前住土瓜灣，諗住過海多車載啦，點知司機都係開價加100元。其實呢個情況持續咗成年，我覺得好影響香港旅遊形象囉！」
《蘋果》放蛇親歷「海鮮的」劏客實況。記者向冚旗的士聲稱到灣仔盧押道，此路程按咪錶收費約35元，但結果要多付50元才獲接載。該錢姓司機肆無忌憚說：「可以用錢去慳番啲時間，都係各取所需啫！載酒鬼好冒險，佢哋郁手郁腳兼嘔到成車都係，加錢當買保險咋！」

警方檢控有難度

記者再測試由蘭桂坊去尖沙嘴，這次司機主動開價；原本70元車費，他定價200元，接近3倍。溫姓司機稱：「截的士睇situation嘅！車費短加長減，你話去元朗我唔睬你！我最鍾意載鬼佬，佢哋返中環四季酒店都肯畀150元，轉頭可以即刻返蘭桂坊再排隊。我見你斯文至載你咋！」
其實每逢夜蒲黃金時間，警方已加派警員到蘭桂坊疏導交通，一方面票控雙黃線上落客的司機作阻嚇，同時驅趕慢駛博搶高價「海鮮的」，但由於檢控司機不按咪錶載客需要放蛇，軍裝警無奈放生這班劏客「海鮮的」，並經常因為驅趕對方、令蒲友遲遲未能截車而發火，引發警民衝突。

蒲友心聲

年輕蒲友：喺中環經常遇到的士加價，例如去油塘車費約120蚊，佢哋就定價300蚊，有時加價太多會選擇唔搭。

Nancy（居港外籍人士）：我家住旺角，深夜要截車過海回家真的很困難！加收費用的情況經常發生。

上一則: 半農半X生活沒法延續
下一則: 黑幫操控曾禁錮三洋妞

********************************************************************************

兩次截糊 夜店老闆楊其龍也中招

蘭桂坊「海鮮的」劏客一視同仁，無論老外還是蒲友都中招。著名夜店Dragon-i老闆、份屬「老蘭蒲王」的楊其龍，上月底被拍到於夜店消遣後，打算截的士離開時兩次遭人「截糊」。深深不忿的他，結果主動提出「睇錶再加二百！」才獲司機接載，非常失威。

惡行影響旅遊業

的士小巴聯盟主席黎銘洪坦言，對蘭桂坊深宵時分被「海鮮的」壟斷表示關注，「佢哋冚旗鎖門、由乘客自行開價嘅方式，其實仍然係犯法，問題係警方要檢控嘅話必須要放蛇，一般軍裝警無可奈何啫！呢個現象好影響香港旅遊業，我一定向警方建議打擊呢班『海鮮的』。」
據現行法例，的士司機不能向乘客濫收車費，違者最高可判罰一萬元及監禁六個月。但業內人士坦言，警方一般只會發出約一千元罰款告票，根本不足以阻嚇業內敗類。這群「海鮮的」掠遊客的惡行，其實不止濫收車費，警方宜應高度關注，「例如話大陸客買咗幾袋名牌，放喺的士尾箱，落車時司機趁亂畀少一袋，事後攞去變賣；亦有司機睇準旅客唔熟悉本地銀紙，明明收咗大額銀紙，就找碎紙畀人，根本係詐騙。」
《蘋果》記者

上一則: 黑幫操控曾禁錮三洋妞
下一則: 踏兩張膠凳婦抹窗墮斃