中環出更：楊明標鍾情綠寶石勞力士

戴名錶係成功男士象徵。見盡無數名錶嘅東方表行創辦人楊明標，到底喜歡甚麼錶？答案原來係鑲有綠寶石嘅勞力士。

東方表行創辦人楊明標鍾情綠寶石勞力士，隻錶幾年間已升值不少。 （徐家浩攝）

楊明標早前獲頒「世界傑出華人獎」殊榮，攞獎係喜事，標叔穿上筆挺西裝上台領獎，不經意露出腕上金光閃閃嘅名錶。

• 放大圖片

係乜錶呢？原來係勞力士。標叔話，隻錶買咗六、七年，特別之處係錶面數字以十二粒閃爍生輝嘅綠寶石代替，綠寶石係矜貴寶石，價值與日俱增，當年購入時不過廿幾萬，如今已升值至三十幾萬，戴錶仲有錢袋，真有眼光。

今年七十四歲嘅標叔，係錶界傳奇人物。一九五一年加入錶行做學徒，由掃地、打雜做起，今日已成為錶業龍頭，錶行版圖由香港伸延至深圳及內地多個城市。佢分享成功之道話，全靠穩打穩紮，從來唔炒樓炒股，有錢就買物業，等錶行唔使擔心租金，發展自然得心應手喇。

卓妮

**********************************************************************************************************

2012年05月15日(二)

中環出更：楊明標獲中大院士 全家到賀撐場

尋日中文大學頒授榮譽院士，表揚對大學有長期貢獻嘅社會賢達，今屆獲得殊榮嘅人來頭猛，好似東方表行創辦人楊明標、利希慎家族後人利漢楨，以及維他奶家族後人羅德承等，佢哋唔少親友都現身到賀，非常熱鬧。

楊明標（右二）獲殊榮，太太（右一）、兒子楊衍傑及新抱Clara（左一、二）齊捧場。（潘翠華攝）

標叔尋日戴住價值七萬元嘅新錶閃耀登場，佢笑言好跟得上潮流，一有新貨就會買。標叔愛妻、三位千金及公子楊衍傑（Dennis）都嚟捧 場，幸福滿溢。Dennis近年已接管父業，佢話現時錶行生意唔錯，不過舖租加幅驚人，銅鑼灣店更加租近一倍，會考慮買物業抗加租。Dennis話，今年 初錶業交投淡靜咗啲，不過內地市場需求依然大，預料年底會有好轉。

利漢楨撐創作自由

利漢楨係著名旅美藝術家，亦係中大兩院嘅藝術顧問，雖出身名門，卻選擇浪迹天涯，旅美期間，一架大貨車裝住幾千本書，就係咁歷遍東西，從來唔用手機同電腦。講到本港藝術發展，利漢楨慨嘆香港社會過於急功近利，唔少人未學行先學走，其實無論繪畫定建築，基本功一定要學好。

羅德承（中）帶埋太太Anita（右）分享喜悅，中大校長沈祖堯（左）都上前恭喜佢。（徐家浩攝）

利漢楨（左三）獲大班親友到場祝賀，崇基學院院長梁元生（左一）都戥佢高興。

對於二次創作，利漢楨笑言，呢樣嘢已經唔係新鮮事，早喺五、六十年代已經有o架啦，只不過當時叫「執人口水尾」。佢話，二次創作冇話好唔好嘅，睇你buy唔buy嘅啫！好似書法咁，大家都係模仿前人嘅筆迹，咁又算唔算侵權呢？佢覺得創作需要自由，毋須立例打壓嘅。
卓妮

 

•